Toʻlovlar 2.0, rejalashtirilgan ovozli chatlar va yangi veb versiyalar
Asl eʼlonni ingliz tilida oʻqish
Bu yangilanishda istalgan chatda toʻlash uchun toʻlovlar 2.0, ovozli chatlar uchun rejalashtirish va mini profillar, brauzerlar uchun Telegramning yangi versiyalari va boshqalar taqdim etilmoqda.
Toʻlovlar 2.0
Toʻlov xizmatlarini qoʻllab-quvvatlash birinchi marta 2017-yilda paydo boʻlgan edi. Toʻlov botlari foydalanuvchilarga istalgan mahsulot va xizmatlar uchun xavfsiz tarzda toʻlash imkonini berdi.
Bugungi yangilanish CLICK va Payme kabi 9 ta toʻlov tizimi yordamida istalgan chatda karta orqali to‘lovlarni qabul qilish imkonini beradi.
Bundan tashqari, toʻlov paytida choychaqa qoʻshish va sevimli muallif, qahvaxona yoki doʻkonni qoʻllab-quvvatlash mumkin. Toʻlov uchun istalgan ilovadan, jumladan, kompyuter uchun Telegramdan foydalanish mumkin.
To‘lovlar platformasi ochiq va bepul – Telegram komissiya olmaydi va toʻlov maʼlumotlarini saqlamaydi. Rekvizitlar bevosita toʻlov tizimiga, yetkazib berish axboroti esa mahsulotni yuborishi uchun sotuvchiga yuboriladi.
Yangi imkoniyatlarni haqiqiy mahsulotlarga toʻlamasdan amalda sinab koʻrishingiz uchun ushbu sinov kanalida bir nechta narxsiz mahsulotlarni joylashtirdik.
Shaxsiy botini yaratishni xohlaganlarga esa dasturchilar uchun texnik hujjat foydali boʻladi.
Istalgan sotuvchi Telegramdan qoʻshimcha tasdiqlashlar olmasdan Toʻlovlar API ishlatishni boshlashi mumkin. Toʻlovlarni integratsiyalashga qiziquvchi dasturchilar Toʻlovlar boʻyicha qoʻllanmada barcha tafsilotlarni topishi mumkin.
Rejalashtirilgan ovozli chatlar
Ovozli chatlar yordamida tanishlar davrasida suhbatlashish va millionlab tinglovchilarga ega translatsiyalarga ulanish mumkin.
Endi guruh va kanallar administratorlari barcha xohlovchilar rejalarini tuzishi, tanishlariga hodisa haqida aytishi va popkornni zaxiralashga ulgurishi uchun muayyan sana va vaqtga kelgusi ovozli chatni rejalashtirishi mumkin.
Foydalanuvchilar chatning yuqori qismida rangli ortga hisoblagichni koʻradi va ovozli chat boshlanishi haqidagi bildirishnomani yoqishi mumkin.
Rejalashtirilgan ovozli chatlarni siz administratori hisoblangan guruh yoki kanal profilidan yaratish mumkin. Android qurilmasida ⋮ > Ovozli chatni boshlash > Ovozli chatni rejalashtirish ruknini bosing. iOS qurilmasida Ovozli chat tugmasini bosing va Ovozli chatni rejalashtirish bandini tanlang.
Xavotirlanmang, ortga hisoblagich nolga yetganida ovozli chat avtomatik boshlanmaydi – u faqat administrator Hozir boshlash tugmasini bosganidan keyin boshlanadi.
Ovozli chatlarda profildan axborot
Ovozli chat oynasidan endi istalgan foydalanuvchining rasmini va tarjimayi holini koʻrish mumkin. Bu siz suhbatlashayotgan odam haqida yaxshiroq bilib olish uchun foydali.
Bevosita ovozli chatdan rasmlaringizni almashtirish va tarjimayi holingizni tahrirlash mumkin. Masalan, oʻyin partiyasi uchun biror qahramonga tezda aylanish yoki soʻzga chiqishdan oldin galstukli rasmingizni yuklash mumkin.
Brauzerlar uchun yangi veb versiyalar
Brauzerlar uchun Telegramning birinchi versiyasi 2014-yilda ishga tushirilgan edi. Shundan buyon ichki raqobat ruhimiz shivirlardi: “Ikkita veb versiyaga ega boʻlish mumkin boʻlganida nima uchun bitta veb versiyamiz mavjud?
Bugun biz ikkita yangi, toʻliq funksiyali Telegram veb ilovalarini taqdim etmoqdamiz – har ikkalasi ham animatsiyali stikerlar, tungi rejim, chatlar uchun jildlar va boshqa imkoniyatlarni qoʻllab-quvvatlaydi.
Yangi veb versiyalar bilan har qanday qurilma – kompyuter yoki mobil telefonda chatlaringizga darhol kirishingiz mumkin. Bu ilovalar nihoyatda samarali boʻlib, faqat 400 KB yuklab olishni (bu 2 ta rasm hajmidan kichikroq) talab qiladi va ular oʻrnatilmaydi.
Har ikkala versiyani ham sinang va qaysi biri koʻproq yoqishini koʻring:
Boshqa Telegram ilovalarimiz kabi ular telefoningizdan mustaqil ravishda ishlaydi: hisobingizga kirganingizdan keyin telefoningizni yaqin-atrofda yoki internetga ulangan holatda saqlashingiz shart emas.
Takliflar va xatoliklar haqida xabar qilish ommaviy platformamizda takliflarni bildirish mumkin.
Android uchun bevosita yuklab olish
Agar ilova versiyasini maʼqul koʻrsangiz, bevosita tg.idealclover.workers.dev/static saytidan Android uchun Telegram ilovasini yuklab olishingiz mumkin. Bunday usulda oʻrnatilgan ilovalar avtomatik yangilanadi va koʻproq ehtimol bilan tezroq yangilanadi, chunki yangi versiya doʻkonda koʻrib chiqilishini kutish kerak boʻlmaydi.
Telegram qayta ishlab chiqish mumkin boʻlgan yigʻmalarni qoʻllab-quvvatlaydi. Qurilmangizdagi ilova GitHub saytida nashr qilingani bilan aniq bir xil ochiq manba kodidan yaratilganligini har doim tekshirishingiz mumkin.
Tez kattalashtirish
Endi chatda rasm va videolarni ularni ochmasdan tez kattalashtirishingiz mumkin: shunchaki ikkita barmoq bilan chimding.
Yaxshilangan video pleyeri
iOS foydalanuvchilari +/- 15s tugmalarini barmoq bilan bosib turish orqali videolarni oldinga surishi yoki orqaga qaytarishi mumkin. Android qurilmasida ekranning oʻng yoki chap qismini bosib turish videoda ushbu amallarni bajarish mumkin. Ikki marta bosilganida 10 soniya oʻtkaziladi.
Maslahatlar va yangi Android animatsiyalari
Har bir yangilanish bilan Android uchun ilova yanada ravonroq ishlamoqda va yangi animatsiyalar bilan toʻldirib borilmoqda. Bu safar – yon menyu chiqqanida va chatlar roʻyxatidan chatga qaytishda.
Telegram funksiyalari haqida batafsil bilib olish uchun chap menyuda Telegram funksiyalari ruknini bosing yoki @TelegramTips kanaliga kiring.
Telegram vakansiyalari
Hozircha shular. Biz allaqachon keyingi yangilanishlar ustida ishlamoqdamiz. Agar hozirgina “Bechoralar, biroz dam olinglar”, deb emas, balki “Ajoyib, mana ishtiyoq!”, deb oʻylagan boʻlsangiz, sizga vakansiyalarimiz roʻyxati bilan tanishib chiqishni taklif qilamiz.
2021-yil, 26-aprel
Telegram jamoasi